ARUBA EN EEN KEUZE UIT HAAR TOPONIEMEN

Ing. Vivienno L. Frank (’30) a presenta su publicacion na Biblioteca Nacional Aruba na juli 2019. Su titulo completo ta ‘Aruba en een keuze uit haar toponiemen met noemenswaardigheden’ (‘Aruba y un seleccion di su toponimonan’). Sr. Frank a traha pa hopi aña como ‘landmeetkundig ingenieur’ na Kadaster Aruba, di 1980 pa 1986 como hefe y a keda nombra na 1986 como Directeur van de Dienst Landmeetkunde en Vastgoedregistratie. Na 1990 sr. Frank a baha cu pensioen pero el a keda traha te cu 2005. Pa e publicacion aki sr. Frank a studia hopi fuente y mapa pa 10 aña largo. E publicacion ta duna informacion di diferente bario y nomber di bario y otro lugarnan na Aruba den orden alfabetico.

Nombernan di luganan na Aruba manera ‘Cudarebe’, ‘Marawiel’, ‘Macuarima’, y ‘Hudishibana’, di unda nan ta bin? Cua ta nan origen? Dicon nan yama asina? E famoso filosofo Griego, Aristoteles, a yega di bisa “Duda ta e comienso di tur sabiduria”. Diez aña pasa, duda den tur e storianan y leyendanan cu ta core rond tocante e origen di e nombernan di luga na Aruba, a condusi cu Ing. Vivienno L. Frank, ex-hefe di Kadaster kantoor na Aruba, a embarca den un odisea pa decifra hopi di e enigmanan cu tabata tin tocante e origen di e toponimonan Arubiano.

Un aventura cu a dura diez aña y cu a hib’e ta consulta hopi documento y mapa antiguo, y cu a desenmascara hopi leyenda bieuw y alabes a pone cu mitologianan nobo a mira luz di dia como “posibel berdadnan”. Berdad ta cu nan tabata mara wiel na Marawiel… pero no n’e forma cu folklore local ta relata. Mayoria hende na Aruba sa cu ‘Hudishibana’ y ‘Cudarebe’ tin nan origen den lenga indjan antiguo, pero cua idioma y kico nan traduccion ta na Papiamento, ta un di e topiconan central di e buki. Cu Macuarima ta bin di un nomber di un princesa indjan? No segun Ing. Frank, kende ta manda e storia aki p’e mundo di fantasia di un conocido escritor arubiano, y ta argumenta e posibel berdadero origen di e nomber.

Fuente: Biblioteca Nacional Aruba-17/07/2019